Wednesday, October 6, 2010

මල්ලී...

මල්ලී
රණ්ඩු කර කර හිටි
සරුංගල් හිත ගැට ගහලා
සිලි සිලි යේ සලිත වුණු ඔච්චම්
දඬු ක‍ඳේ බැඳලා
ලොකු නමක් තියෙන
දිග‍ට දිග පාරක් තියෙන
කකුල් හති වැටෙනකං
ඇවිදින්න වෙන
බෝඩිමක
දුක් විඳින්න නවත්තලා
මං ආවා
මහ වැ‍ස්සෙ තෙමි තෙමී
මුලු පාර පුරාම අහුරගෙන හිටි
මීදුමට තුරුළුවෙවී
අතීතය මහපොළවෙ වැදී
විසිරෙන්නට හැර
ගලා එන
ලබන මාසේ  බෝඩිං ගාස්තු ......

Wednesday, September 1, 2010

ව්‍යාපෘතිය





විවාහ ව්‍යාපෘතිය අවසානයි.
දිගත් නැති පලලත් නැති
මෙලෝ රහක් නැති
ව්‍යාපෘති විවාහයට අවසරයි.



මං දකින ලෝකය....

මං දකින ලෝකය....
කළු පාටට ඉරි ඇගෙන
ඒ උඩ එහෙට මෙහෙට දුවන්නේ...
නිල් ඕසෝන් සුදු කාබන්ලා
බෙදා වෙන්කරගන්නේ..
ඒ ඉරි ටිකකින් මැකෙන්නේ...
කොළ පාටම ඇඳන් හරිත කැලෑ
කාන්තාර මුඩු බිම් එහෙමත් නැති
තැන්වලත් සද්ද නොදාත්
මරාගන්නේ මරාදමන්නේ....

තටු ගගහා ගින්නට පැනලා
ඒකෙම වෙලිලා පිච්චෙන්නේ....
ක්රෑස් හඬිනුත් හඬක් නැතිවත්
මුළු රෑම මූසල කරවන්නේ.....
තට්ටු තට්ටු උඩු දුවන්නේ..
මේ පාටවල්ම උස් මුදුන් යා කරන්නේ....

ටකස්..ටකස්...රස බොජුන්....
වීදුරු හරි ලස්සනයි

විනිවිදත් පෙනෙයි ‚අතරින් පාටත් පේන්නේ....
පාර්ලි*!මේන් ඉන්තු* මත්වෙන්නේ...
ඒක ‍එපා! අරක හොඳයි.
මහත්තයෝ‚ගෙදර දරු බඩගින්නේ
එයා දාලා ගියේ ගිය සුමානේ
ඒකයි මේ....
සාදු!දෙයිවමේ!
හඳුන් දම් මැද බෝ කොළ සෙලවෙන්නේ...
එහෙ‍මයි කිව්වට මෙහෙමයි කරන්න‍ වෙන්නේ...

උඹලා සී‚එච්‚ඕ‚එන්‚පී‚කේ
කියලා හොයාගත්තනේ....
ඒවයේ සමඟියේ බලය වෙන්නැති
එකඑක විදියට ‍දකින්න ලැබෙන්නේ....
මඟුල් තුනක් එක දවසේ කකා
නිවනට පිදුරුදා ගිනි තියාගන්නේ....


නිවන කොහිද?
මෙහෙ තව කොයි තරම් දේවල්ද හාමුදුරුවනේ....

Sunday, August 15, 2010

මිනිසුනේ!



මිනිසුනේ!
ඇති හොඳටෝම ඇති..
පෙලුනා .. තැලුනා
“ජෙලිය”
පේනවා වගේම හරිම මෙලකයි
දැනීම උපරිමයි
විශාදය.. ආතතිය.. අවඵලයි.
ගෞරවය..අභිමානය..යහපැවැත්මයි.

“ජෙලි..”
එකිනෙකින් බලගැන්වු
ව්‍යවස්ථාපිත වූ
රස.. පාට වගේම
නුසුදුසු..කල් ඉකුත් වූ
“ජෙලි..”
 “ජෙලිය”ට
ප්‍රතිලෝමව සලකයි

අව්වට වැස්සට පෙලුනා මදැයි
නුඹේ ඔය ජෙලි කළඳ
දැන් හයියෙ පදම නියමයි
“ජෙලි.. ජෙලි”
ජෙලි සමූහය
මුදු මෙලෙක් චාටු පෙනුම යොදාගෙන
නුඹේ හුස්ම නරක් කරාවි!

අහසටත් බැහැ පාත්වෙන්න උදව්වකට
හතර අත‍ට හතර කොණින් බැඳලයි තියෙන්නේ...

අවදිවෙන්-සිටගන්- “ජෙලිය”
ශබ්ද නගන්-සෙලවෙන් -“ජෙලිය” !!!

ලබ්-ඩබ්ට ලැජ්ජා හිතෙන
ඔප දැමූ
ප්‍රශස්ති ගැයෙන
ජෙලි ගොහොරුවේ
ප්‍රසූත වී නුඹේ දරුවත්
අඬාවි නිවටව!

Tuesday, June 22, 2010

අදහනු අකමැති සිදුවීම්...


නු‍‍‍ඹේ ඇඳුමට වඩා සුදු

වළාකුළු ඉරා
වැටෙන වැහිබිංඳු
ඇදගෙන යයි මහ පොළව
බෝ‍ඩිමේ පඩියට යටින්....

නු‍ඹේ කුස මහැර
වැළඳු රසබොජුන්
පැළඳු පිනි බිංදු
නැරඹූ පිය දසුන්
ඉකිගසයි
දෑස් පියාපත් අඩකුණු කරවමින්...

නුඹේ හිනහව වගේම සුදු
කොඩිය සැලි සැලී
නගන ගිගුම්
කණින් කණ හකුලයි


1.කුණු ගොඩක් ළගම ඒ කුණු ගොඩින් අහුලාගත් පිලුණු වු බත් පැකට්ටුවක් ආහාරයට ගන්නා මනුස්සයෙක් මගේ දෑසින්ම දුටුවත් මට තවමත් ඒ මොහොත අදහාගත නොහැකි වු සැටි තාමත් මතකය.

2.කොන්ක්‍රී‍ට් කැබැල්ලකින් ගසා නිදාගෙන සිටි ආබාධිත යාචකයකු මරා ඔහුගේ මුදල් පැහැරගත් සිද්ධියක් පුවත් පතක 
දුටු විට මට නිදාගන්නටත් භය සිතුනු හැටි මතකය.

3.කොළඹ බෝඩිමක නැවතී සිටි අවුරුදු 20ක ගැහැණු දරුවෙක් දුර්වල පෝෂණ තත්වය හේතුකරගෙන සාමාන්‍ය උණකටවත් මුහුණ දී ගත නොහැකිව මිය ගිය පුවත ඉහත කවිය ලියන්නට මට බල කරන ලද්දකි.

‍අහෝ! මා වටා සිදුවන්නේ අදහාගත නොහැකි සිදුවීම් සමුදායකි.
මේ මා කොළඹ දැක්ක ආකාරය විය හැකිය.කොළඹ මීට වඩා හොද විය හැකිය.
නමුත් මීටත් වඩා නරකක් තවත් ඉවසනු බැරිය.

 "මෙදියත මහා දුක් දැක දැක
නිතර නිතර මහා හයියෙන් හඩනු බැරිව
අමුණමි කවි අකුර අකුර
ඒ කවි
මගේ සිත් නෙතගින් වැටෙන
කවි කදුලුය"

මෙය මාගේ මිතුරකු විසින් මට කරන ලද සඳහනකි.එය මෙහිලා භාවිත කලාට මා හා අමනාප නොවනු ඇත.
මාගේද අත්තටු බිදී ඇත ඛලීල්,නුඹේ පෙම්වතිය මෙන්ම අන්ත අසරණවූ මිනිසකුව බේරාගත නොහැකිව බිදුණු අත්තටු වේදනාවෙන් මොරගාන හඩ මට හීනයෙන්ද ඇසේ.පියාපත් විහිදා ජීවත් වීමට නිදහස් විය යුතුය.නිදහස් වීම යනු නිර්වාණය ලගා කරගැනීමටය.එසේ නම් අප පාරමී දම් පිරීමට පටන් ගත යුතුය.සියලුම දෙනා තම තමන්ගේ ජීවිත වල බුදු වීම සඳහා පෙරුම් පුරන බවනම් සැබෑය.නමුත් එය නිර්වාණය අත් කර ගැනීමට නම් නොවේ.ලෞකික අසමසම බව අත්පත් කර ගැනීම සඳහාය.වෙනදේ ඔබ බොහෝ හොදින් දන්නේය.‍‍‍..විස්තර අනවැසිය.

ආදරය කරුණාව දයාව මෛත්‍රිය වාෂ්ප වී යමින් ආසාවේ හිරු තව තවත් රැස් විදා දිලෙන්නට පටන්ගෙනය.මාගේ මිතුරියක මගෙන් ඇසූ ප්‍රශ්නයක් වනුයේ "පිච්චෙන බව දැන දැනම ඇයි දුකටම ඇදෙන්නේ?" යන්නය.
මා ළග පිළිතුරක් නැත.ඒ මමය.ඔබද මෙසේ විය හැකිය.බිදන් බිද පිපාසාව නිවා දැමීමට බිදෙන් බිද දිය රැස් කල යුතුය.දිව ගිලිමට බොහෝ ආසන්නය.



Monday, June 21, 2010

මකරාක්ෂයා

මකරාක්ෂයා-ධර්මසිරි බණ්ඩාරනායක
මකරා හොඳය.මකරා ලස්සනට කරුණාවට ආදරය කරයි.නමුත් ඔහු පවතින්නේ අන්ධකාරයේය.පරමාර්ථය‚ ආත්මාර්ථය වඩවා ගැනීමය.එවිට මකරාගේ අඳුරු කොරපොතු වල අවලස්සන හා නියපොතුවල වේදනාව බාහිරට දැනෙන්නට පටන් ගනී.මුවේ  ගින්දර වලට සියල්ල අළු කල හැකි බව දැනී යයි.ඒ වේදනාවට බිය ය.එබැවින් මකරා තවමත් හොඳය.බිය පහ කිරීමට බාහිර බලවේගයක් ඇවැසිද?
මකර නගරයේ කලාකරුවෝ අතුරුදහන් වී සිටියහ.නමුත් මෙහි සියල්ලෝම අතුරුදහන් වී සිටිත්ද?අධ්‍යාපනඥයින්-විද්‍යාඥයන්-දේශපාලනඥයන්-ආර්ථික විද්‍යාඥයන්-.....මෙහි වගකිව යුතු පාර්ශවයට මම-අපි-ඔබ සියල්ලෝම ඇතුලත් නොවන්නේද?
මිනිසුන් ඇතුලේ කුඩා මකරකු සිටී.ඒ කුඩා මකරන් මහා මකරකුගේ ආභාෂයෙන් උපත ලද්දන්‍ වේ. මහා මකරුන් මර්දනය කළද කුඩා මකරුන්  බැහැර කිරීම ස්වයංශෝධිත ක්‍රියාවක් බව පැහැදිලි කරයි.මේ කාලයේදී මකරුන්ගේ බෝවීම අති බහුලය.දේශපාලනික-සමාජයීය-ආර්ථික-අධ්‍යාපනික-සංස්කෘතික යන විවිධ ස්ථරවල මකර බලපෑම් දැකිය හැකිය.තමන්ගේ පැවැත්ම තහවුරු කර ගැනීම සඳහා ව්‍යාප්ත කල මකර ජාන වල බලපෑම් කිරි පිටි බොනු ලබන කුඩා දරුවකුගේ කිරි ජෝගුව මෙන්ම විශ්‍රාම ගිය වගකිව යුතු පුද්ගලයන්ගේ ජීවන තොරතුරු මඟින් ද ඉදිරිපත් කරනු ඇත.
මකරාක්ෂ පිළිබඳ අවබෝධයෙන් සිටින්නන් හට මකර පැවැත්ම සඳහා ඇති කරවන ගින්නේ පීඩාකාරී උණුසුම ද පීලි ගඳ ද ගර්ජනාවේ පුහු ඝෝෂාවද හොඳින් වැටහේ.නමුත් ජීවි අජීවි සියල්ල නිශ්ශබ්දය.ලාන්ස්ලොට්ගේ අභීත භාවය යනු සටනේ උත්ප්‍රෙරණයයි.ඒ සඳහා ලාන්ස්ලොට් ක්‍රියාකාරී විය.කිසියම් භයක් ඔහු ජය ගෙන තිබිණි.ප්‍රතික්‍රියාව උත්ප්‍රේරණය කිරීම සඳහා මූලද්‍රව්‍ය ක්‍රියාකාරී විය යුතුය.ඝට්ටනය විය යුතුය.මූලද්‍රව්‍ය නිද්‍රාගතය.උදාසීන හෝ මූලද්‍රව්‍ය අතර ප්‍රතික්‍රියාවක් තිබුණේ නම් උත්ප්‍රේරණය ප්‍රශස්ත උෂ්ණත්ව යටතේ මනා ප්‍රතික්‍රියා සීඝ්‍රතාවයක් ලබා ගනු නොඅනුමානය.මකරාක්ෂ යනු අඳුරු අහස මොහොතකට එළිය කල මල් වෙඩිල්ලක් සේ රඟහල තුලම හෝ නරඹන්නන්ගේ හිත් තුලම හෝ නිෂේදනය වනු ඇතැයි ද සැකය.
මහා ගිනි රශ්මියක් ඇවැසි ඝනීභූත ශීතලට ගිනි පුපුරත් වටිනා බව පිළිගත යුත්තේ ගිනි පුපුරු කෙසේ හෝ ගිනි ඇවිලීමට සමත් නිසාය.
“සර් ලාන්ස්ලොට්‚දිගුකලකට පසු මම ඔබව දැක්කේ.ඔබට කුමක් සිදුවීද? හිසකෙසුත් සුදු වෙලා.”-එලිසා
ඔව් ලාන්ස්ලොට්‚කල යුත්ත නොදත් කාලයේදී මකරාක්ෂ නම් අගනේය.ඔබට උපහාර!
ප.ව-නාට්‍යයේ ඇති නාට්‍යට අදාල වූ අනිකුත් ලක්ෂණ වලට පෙර එහි සාරය වැදගත් විණි යයි සිතුණි.රඟපාන ලද පුද්ගලයන් අමුතුවෙන් රඟ පෑ යුතු නැත.ඔවුන් විදා දැක්වීමට උත්සුක වන චරි ඊටත් වඩා හොඳින් යථාර්තයේදී රඟපානු දැක ඇත්තෙමි.
- ඉෂූ